أحدث قصائد الشاعرة الدكتورة مرفت محرم
يا فل يا فول
بقلم الشاعرة د.مرفت محرم
يا فل يا فول يا طبق الأمير
فطارك ياسيدنا وغدا للفقير
وقعت فى حبك وقوع الأسير
وإنته مالكنا بود وحنين
**********
صباح الفل يا طبق الفول
يا سيد الكل سيبنى أقول
فى وصفك شعر يكون معقول
يا شهم يا زين
**********
دا ريحة الفل من ريحك
بياض القلب تسبيحك
يا لوحة فن بتريحك
يا متعة عين
**********
ونابت فيك منابتنا
وشوربتها بقى ف بيتنا
حلاوتها ف حلاوتنا
بتغنينا عن الملاعين
**********
بعيد عن حمى تقلعنا
أوانفلونزا تخدعنا
يا صحن الفول مدلعنا
وفيك فيتامين
**********
وفى الشارع وفى الحارة
تطل علينا بجسارة
وفيك طعمية وبصارة
غذا المساكين
**********
قالوا عنك كتير وقليل
وتستاهل يا فول يا أصيل
وأدى الضعفان صبح كالفيل
بفضل حديد بقى وبروتين
**********
وآه يا سلام لو البصلة تكون جنبك
تغازلها وبتغازلك
تغير منها طماطماية فتندهلك
وتهديلك شوية زيت من الحارين
**********
تقوم حافظ على السكر بقى فى الدم
تزيل إجهادنا وتعبنا فى ثانية يا عم
وتنعشنا تفرفشنا تزيل الهم
يعود الفرح من تانى لقلب حزين
**********
خاتمة
صباح الفل ...يا طبق الفول
يا طعم البصارة بحرارة خطير
وريحة الفلافل قول ما تقول
بيجرى فى دم أحسن وزير
دا مهما عاندنا ومهما بعدنا
برضه انته حبيبنا .... والكبير كبير
......................................
ـ نُشرت هذه القصيدة فى موقع دنيا الرأى رابط :
ـ نُشرت هذه القصيدة فى موقع سما فلسطين الأدبية رابط
