أحدث قصائد الشاعرة الكتورة مرفت محرم
حمارى سابنى
شعر : د.مرفت محرم
*********************
حمارى سابنى وقال لزمانى
مهو جه غيرى وحل مكانى
جالك التوك توك أحسن منى
والتروسيكل جرى قدامى
راجع تزعل وجاى تلومنى
ما هو م الحكمة صنت كيانى
قالوا كتير وكتبوا عنى
إنى أصيل وكمان حقانى
تاهت الحكمة وغرقت منى
والأخلاق ماتت فى زمانى
وحمارى سابنى وبعد عنى
قاللى دى توهه وجرى قدامى
حمارى يا دارى بحالى وحالك
أنا آمر وإنته مطرقع ودانك
يا شايل حمولى وهمومى سنين
يا مين راح يطيعنى يا مخلص بدالك
وأسمع ألاقى فى صدرك أنين
لكن مستكين .. وراضى بعيشتك
وسرك دفين .. وبيبان فى وشك
ملامح عذاب السنين الطوال
يا قوة تحمل .. يا رمز اصطبار
ونارك بتولع ما بين الضلوع
تجوع .. ما تنطق تقول الطعام
وتعطش فتشرب عرق مز جسمك
وإسمك حمار
وجالك قرار : إما الساطور اللى جار
وإما الفرار.. وتنفد بجلدك
حرام انك انته ما ثورتش زمان
وبوست الإيدين بكل استكانه
قبلت الإهانه
قالولك وضيع ..
وضاعت كرامه ما شكروا الصنيع
وراحوا يبيعوا اللى عايش حياته معانا
مطيع ...
وجابوا الماتور
وجابوا الحديد اللى يشبه قلوبهم
صديد المشاعر
وإحساس بليد
حمارى يا دارى بحالى وحالك
ف بالى وبالك دروس للتاريخ
عشان تستفيد ...الأمم والشعوب
فلا تستكين
ولا مره تانيه تتطاطى لواطى
تبوس الإيدين
فإما تعيش بعزة وكرامه
وإما الوفاه
فلا حل أوسط مابين الرحيل
ومابين الحياه
...................................
ـ نُشرت هذه القصيدة فى موقع دنيا الرأى رابط :
ـ نُشرت هذه القصيدة فى موقع سما فلسطين الأدبية رابط :
